Tsy mijanona amin’ny tontolo ara-panahy ihany ny Fiangonana Advantista fa mijery ihany koa ny lafiny ara-batana sy ny saina. Hotanterahina ny herinandro ho avy izao ny hetsika Expo-Santé.

Expo Santé

Mikarakara ny hetsika “Expo-Santé” ny Fiangonana Advantista. Eo amin’ny tokotaniben’ny Lapan’ny Tanàna no hanatanterahina izany ny Alatsinainy 13 May ka hatramin’ny Talata 14 May izao, manomboka amin’ny 8 ora maraina ka hatramin’ny 5 ora hariva.

“Antananarivo salama”, io no lohahevitra amin’izao hetsika ara-pahasalamana izao. Tanjon’ny Fiangonana advantista amin’ity hetsika ity ny hanasoavana ny mpiara-belona araka ny baikon’i Jesosy sy araka ny vinan’ny Fitondram-panjakana malagasy, dia ny fanomezana maimaim-poana hoan’ny vahoaka Malagasy.

Nampahafantarina ny mpanao gazety ny hetsika. cc : Toria Dimbiniaina

Misokatra hoan’ny rehetra ary maimaim-poana avokoa araka izany ny tolotra hita ao amin’ity “Expo-Santé” ity.

Tolotra

Maro ireo tolotra hita mandritra ity “Expo-Santé” ity toa ny fijerena ny tahan’ny rano ao amin’ny vatan’ny olona iray mitaha amin’ny lanjany, halavany, taonany, ary amin’ny maha-lahy na maha-vavy azy.

Hisy ihany koa ny fijerena ny tosi-drà sy ny tahan’ny siramamy ao amin’ny vatana. Tsy adino ihany koa ny torohevitra fampiasana ireo fanafody valo maimaim-poana avy amin’Andriamanitra.


Anisan’ny zava-dehibe amin’ity hetsika ara-pahasalamana ity ny fizahanam-pahasalamana maimaim-poana ataon’ireo “Médecins spécialistes- Médecins généralistes- Paramed” mikasika ny : fahasalaman’ny fo, ny lalan-drà,ny fahasalaman’ny reny , fahasalaman’ny zaza, vehivavy, areti-koditra, fizahana maso, famorana zaza, dépistage diabète, dépistage otrik’aretina VIH ary ny torohevitra ara-pahasalamana.

Ankoatra izay dia hisy ny fampirantiana sakafo ara-pahasalamana sy ny fampirantiana boky mirakitra torohevitra ara-pahasalamana.

Tsara ny manamarika fa efa maro ireo hetsika momba ny fahasalamana toy izao any amin’ny fokontany isanisany mba hitandrovana hatrany ny fahasalaman’ny mpiara-belona.

Toria Dimbiniaina


Leave a Reply

Your email address will not be published. Required fields are marked *

%d bloggers like this: